Maele le Ditlhaloso
LEELE | TLHALOSO | |
---|---|---|
1 | Go adima motho ditsebe. | Go reetsa motho. |
2 | Go aga mo pelong ya motho. | Go ratiwa thata ke motho. |
3 | Go aketsa tsorwane. | Go ja go le gonnye fela go fokotsa tlala. |
4 | Go akga matsogo/diatla. | Go tsamaya/boa o sa tshola sepe, mme go solofetse go re o bo o sikere. |
5 | Go akga/goga dinao. | Go dira tiro/go tsmaya ka bonya o gololesegile. |
6 | Go akga/nna leleme. | Go bua thata o tsamaisa maaka. |
7 | Go anetswa dipodi. | Go tsiediwa ke motho o re o a mo thusa. |
8 | Go anywa phiri. | Go tshologa ditete o robetse. |
9 | Go apara kobo le motho. | Go kgalema motho ka tlhwaafalo. |
10 | Go apara/rwala ditsebe. | Go sa lemogong dilo tse di diragalang mo pontsheng ya gago. |
11 | Go aparwa ke lefifi. | Go iphitlha ka lefifi o sala o sa bonale (gantsi fa o batla go dira dilo tsa sephiri). |
12 | Go apaya ke lonao. | Go nna o etela batho go re o je teng. |
13 | Go apeela mo lephogong. | Goitsholofetsa maduo mangwe, mme a bo a sa nne. |
14 | Go apeela thukwi/noko le mala. | Go tlhakatlhakanya dilo. |
15 | Go apesiwa kobo ka letshoba. | Go sokodisiwa ke sengwe/mongwe ka lobaka. |
16 | Go atamela monyo. | Go nna mokhutshwane. |
17 | Go baba lonao. | Go rata go tsamaya bobe. |
18 | Go bapalela mo kgetsing e e letshoba | Go dira tiro e e se nang maduo. |
19 | Go bapelwa le digarawe. | Go lwala thata mo go solofelwang go re o tloga o swa. |
20 | Go bapolana ka mafoko. | Go buisana dikgang tse di seng monate go omanwa. |
21 | Go bapolela dimapo tlapeng. | Go dira tiro e e bokete, mme maduo a yone a le mannye. |
22 | Go batla gotswana lwa phiri. | Go leka go batla sengwe mo lefelong le go leng thata go re se ka bonwa. |
23 | Go baya bobi matlhong. | Go fitlhela motho nnete. |
24 | Go baya fa ntshung. | Go ja. |
25 | Go baya motho lefoko. | Go lebisa motho mabaka kgotsa go mmolelela mafoko ka tlhwaafalo,. |
26 | Go baya motho leswabi. | Go sa otlhaeng motho gone foo, mme go sa reye go re o mo itshwaretse. |
27 | Go baya motho mabele a kgomo. | Go kgwathisa dithupa tse nne. |
28 | Go baya motho mabele a kolobe/ntša. | Go kgwathisa dithupa tse di ntsi. |
29 | Go baya motho mabele a podi. | Go kgwathisa dithupa tse pedi. |
30 | Go baya pelo. | Go sa felelweng ke tsholofelo. |
31 | Go baya sengwe letlhaku. | Go ipeela seengwe go re o tla se dira nako nngwe. |
32 | Go baya tau botsetse. | Go tshela ka phuthologo mo seemong se se borai. |
33 | Go beeletsa motlhatswa ka tshega. | Go itsupa go re ke wena mong wa sengwe. |
34 | Go bega pitsa o tshotse molelo. | Go bega go re tiro e weditswe mme e ise e simolowe (ka o dumela go re o tla kgona go e wetsa). |
35 | Go betsana/itaana ka noga e utlwa. | Go ilana la go swa; go tlhowana thata mo go feteletseng. |
36 | Go betwa ke pelo. | Go tenega thata mo o feleletsang o sa kgone go itshwara. |
37 | Go bewa sebata se sentsho. | Go latofadiwa ka sengwe se se bosula. |
38 | Go bina motho phuphu. | Go itumela motho yo mongwe a le mo mathateng. |
39 | Go bipa mpa ka mabele. | Go sireletsa motho yo o mo ratang ka go tsenya ba bangwe mo dipharagobeng. |
40 | Go bipolola momela. | Go ntsha sephiri. |
41 | Go bitsa kgomo le namane. | Go rekisa ka tlhwtlhwa e e kwa godimo thata. |
42 | Go bo bana ba wela mo isong. | Go le thata go sena dijo mo lwapeng, ka ntata ya leshekere. |
43 | Go bo dikgomo di sia ka marole. | Go le thata go baakanya seemo se se bifelang pele. |
44 | Go bo maoto a nkga tsela. | Motho a le gaufi le go tsamaya. |
45 | Go bo metsi a tsena mo mantlong. | Go le thata go baakanya seemo se se bifelang pele. |
46 | Go bo mogwang o ile borwa. | Fa modiro o ile bokhutlhong. |
47 | Go bo moretlwa o lelela boatleng. | Fa batho ka otlhaiwa ka dithupa tsa dintsi. |
48 | Go bo motseto o fapogile marago. | Go le thata go baakanya seemo se se bifelang pele. |
49 | Go bo motsetse a ja ka letsogo. | Seemo se le thata thata. |
50 | Go bo mpuru a faretswe. | Seemo se le thata thata. |
51 | Go bo pelo e rotha madi. | Motho a hutsafetse fela thata. |
52 | Go bo setoropo se napetse. | Bothata bo sa kgone go rarabololesega. |
53 | Go bo tsela e tsene ka sekgwa. | Go le thata go baakanya seemo se se bifelang pele. |
54 | Go bobisa mmutla. | Go robala o sa thulamela thata. |
55 | Go bogola poo e tsweletse ka go bopa. | Go tswelela o leka go dira sengwe mme se ntse se gana go direga. |
56 | Go bokalatsa dintshi. | Go robala o sa thulamela thata. |
57 | Go bona sengwe ka letshotsha. | Go fitlhelela sengwe kwa o neng a sa se solofela. |
58 | Go bona/kopana le lerwa/nta le fuduga. | Go iphitlhela o le mo mathateng a a seng kana ka sepe. |
59 | Go bonela motho letsatsi pele. | Go feta motho ka matsalo. |
60 | Go bontsha motho dinaledi. | Go betsa motho thata mo a felelang a bona lesedinyana le le kareng dinaledi mo matlhong. |
61 | Go bopela motho kgomo ya mmopa. | Go tlhama maaka ka motho mme a felele a dumelesega. |
62 | Go bowa ka nngobana e sa fotlhwa. | Go sa atlegeng mo maitekong a gago. |
63 | Go bua diphirimisi. | Go bua dilo tse di senang mosola, ebile di hutsafatsa. |
64 | Go bua gabedi. | Go bua o feta o ikganetsa, mme o dira ka bomo go leka go sia ka ditlhaloganyo tsa batho. |
65 | Go bua ka pelo. | Go akanya thata. |
66 | Go busa ka seroophate | Go busa ka kgatelelo. |
67 | Go di ema ema. | Go tsena mo mathateng. |
68 | Go di emela. | Go lebagana le ditlamorago. |
69 | Go di ga o di tlatsa kobo di sena morwadi. | Go itirela mathata a o sa tleng go a kgona. |
70 | Go di gadikela go di phura. | Go dira sengwe se o itseng go re sa a go felela se go utlusitse botlhoko. |
71 | Go di gama o sa di tlhapela. | Go tsena mo mathateng. |
72 | Go di gamela mo thotaneng/ mokgokoloseng. | Go tsena mo mathateng. |
73 | Go di kapa. | Go tlhapelwa. |
74 | Go di tlhaolela di bekerwe. | Go tsaya kgato go setse go le thari. Go leka go kganela selo se setse se diragetse. |
75 | Go dira ka meno a maleele. | Go dira sengwe mme o sa batle. |
76 | Go direlwa fela o se naga. | Go neelwa dilo motlhofo. |
77 | Go duba motshelo. | Go tlhakatlhakanya dilo kgotsa o omantsha batho. |
78 | Go duba thankga. | Go tshwaragana le tiro e ntsi thata. |
79 | Go dumedisa mhikwana. | Go bona lesea le sa tswa go tsholwa. |
80 | Go e latswa bobe. | Go bua thata ka sengwe. |
81 | Go e pega thaba e tlhotsa. | Go oketsa mathata a yo mongwe. |
82 | Go ela motho ka dinakana bodibeng. | Go solofetsa motho go re o tla mmusetsa sengwe mme o bo o ela ruri. |
83 | Go ema motho nokeng. | Go ema le motho, o mo thusa a le mo mathateng. |
84 | Go epa pitso. | Go bitsa phuthego ya kgotla. |
85 | Go epela selepe. | Go dira kagiso/go emisa ntwa. |
86 | Go eta/jaka ka loleme. | Go natefelelwa ke diteme tsa merafe e sele, o bo o bua jaaka bone. |
87 | Go falola ka bobi ja segokgo. | Go falola ka lesego. |
88 | Go fatlha/tshosa dipeba. | Go tlhapologa. |
89 | Go fela pelo. | Go felelwa ke boitshoko. |
90 | Go felelwa ke tlhale morutsheng. | Go felelwa. |
91 | Go feroga/emelela dibete. | Go ikutlwa jaaka e kare o tloga o tlhatsa. |
92 | Go feta ka tse di tsididi. | Go fenya kgaisanyo go le motlhofo, o sa sokola. |
93 | Go feta metsi o tshwara seretse. | Go rumulana thata go feta selekanyo se se neng se ka bewa. |
94 | Go fetoga phuti boloko. | Go sia o iphalotsa. |
95 | Go fetoga/tswa motlhanka wa mafoko a gago. | Go itatola se o se buileng. |
96 | Go fisa baeng marago. | Go dira moeng go re a tsamaye ka bonako go feta jaaka a ne a eleditse. |
97 | Go fitlha lesiela. | Go fitlhela batho mathata a o ka tswang o na nao. |
98 | Go fitlhela bana ba tladi ba ntse dibothwana-bothwana. | Go tsena mo mathateng. |
99 | Go fitlhela naga e le tshetlha. | Go fitlhela go sena ope. |
100 | Go fitlhela tau e ja bojang. | Go le thata go sena dijo mo lwapeng, ka ntata ya leuba. |
101 | Go fula mo melelwaneng. | Kotsi e gaufi le go direga. |
102 | Go gama o ikotelela. | Go tshwaragana le tiro e ntsi thata o sena mothusi. |
103 | Go gana go ya magaleng ga bedi. | Go gana go tsena mo seemong se se tshwanang le se o kileng wa nna mo go sone mme se go utlwisitse botlhoko. |
104 | Go gana nnang wa banyana. | Go gana go dira sengwe, o gana o gatelela. |
105 | Go gapa dipotsane. | Go tlhapelwa. |
106 | Go gata monwana wa kgonotswe. | Go rapela o tshogile go re sengwe se direge kgotsa se seke sa diragala. |
107 | Go gata tlhakwana. | Go loba sephiri. |
108 | Go gatisa motho magala. | Go utlwisa motho botlhoko o ipusoloetsa mo sengweng se a kileng a se go dira. |
109 | Go gogela kobo ntlheng e le nngwe/ya gago. | Go sa tseyeng seemo ka tekatekanyo, o sekamela kwa go thuseg ba ga lona. |
110 | Go gogola dikgomo ka mono-wa-thoko. | Go oketsa khumo ya gago mme o sa bereke thata. |
111 | Go golola tlou le maroo. | Go tsaya nako e ntsi o bua ka selo se le sengwe, mme dikgang tse di emetseng go buiwa di le dintsi. |
112 | Go gopola motho ka kgamelo. | Go gopola motho fela fa o tlhoka thuso ya gagwe. |
113 | Go gora/latswa kika. | Go swa. |
114 | Go gowa naga. | Go ikuela ka sengwe mo bathong, mme go sena yo go tsayang tsia. |
115 | Go hema ka nko e le nngwe. | Go lwala thata mo go solofelwang go re o tloga o swa. |
116 | Go hupa tedu. | Go ngala o sa buisanye le ope. |
117 | Go ijesa dipherefere. | Go itshakgatsa jaaka motho yo tenegileng. |
118 | Go ikapeela bodila. | Go itsenya mo mathateng. |
119 | Go ikepela lemena. | Go itsenya mo mathateng. |
120 | Go iketsha maswe dinaleng. | Go thusa fa batho ba le mo mathateng. |
121 | Go ikgogela metsi ka moselo. | Go itsenya mo mathateng. |
122 | Go ikitaya ka thupana. | Go ithotloetsa go dira sengwe se se saletseng ko morago. |
123 | Go ikodisa dibi. | Go ipuisa dilo di sele go re e nne ekare ga o itse boamaaruri. |
124 | Go ikoketsa marago ka matlapa. | Go ipaya botoka go na le ka fa o ntseng. |
125 | Go ikutlwisa mathaithai. | Go ithutela mo mothong go dira bonweenwee. |
126 | Go inaya/ipha naga. | Go sia [gantsi go tewa batho ba le bantsi] |
127 | Go inela motho diatla metsing. | Go itshwarela motho. |
128 | Go ingwaya ka meno. | Go sotlega/humanega fela thata. |
129 | Go inosa ka nkgo. | Go dira selo e le lantlha. |
130 | Go ipagololela mogodu. | Go inaya ditshwanelo tse o iseng o di rebolwe ke ba ba lebanyeng. |
131 | Go ipala mabala a kgaka/nkwe. | Go ikaya bontle/go ikopela lorato. |
132 | Go iphaga dikoro. | Go dira tiro e e sa go lebanang/o sa e neelwang, ka maikaelelo a go re o bone dikatso dingwe. |
133 | Go iphalela segau sa lonaka. | Go ithaya o re o fentse sengwe, ntibo se tsile go menoga ka wena. |
134 | Go iphara mo molaong. | Go dira molato o ntse o itse go re se o se dirang ke molato. |
135 | Go iphatlha ka diphuka. | Go ipakela melato fa go neng go sa tlhaokafaleng. |
136 | Go iphitlha ka monwana. | Go leka go latola nnete e meng le mang a e bonang. |
137 | Go ipolaya wa tloga wa re o loilwe. | Go ipiletsa mathata. |
138 | Go isa marapo go beng. | Go robala. |
139 | Go isa nonyane borwa. | Go dira tiro e e sa tlhokafaleng. |
140 | Go isa phuduhudu Bosarwa. | Go isa selo ko se leng se ntsi teng. |
141 | Go itaya ka kwa ntle/kwano. | Go fosa/go retelelwa. |
142 | Go itaya se fololetse. | Go retelelwa. |
143 | Go itaya/opa kgomo lonaka. | Go bua boammaaruri. |
144 | Go itaya/opa matshwane mo nkong. | Go bua boammaaruri. |
145 | Go iteba dinala. | Go nna setshwakga go berekwa. |
146 | Go iteela kobo moroko. | Go tlatsa mafoko a a setseng a builwe. |
147 | Go itekanya morwalo. | Go lekanyetsa ditiro tsa gago le bokgoni ja gago. |
148 | Go itewa ke ditshikaro. | Go tlelwa ke poifo ya go re sengwe se se bosula se tloga se diragala. |
149 | Go itewa ke setšhane. | Go digwa mowa ke go bona maduo a a sa tshwaneng le a a neng o a solofetse. |
150 | Go itewa/betswa ke lefatshe. | Go sotlwa ke manokonoko a se o se dirileng. |
151 | Go ithela molelo. | Go buo dilo tse di go tsenyang mo mathateng fa go neng go sa tlhaokafaleng. |
152 | Go ithwala. | Go ima. |
153 | Go ithwesa magala mo tlhogong. | Go itsenya mo matshwenyegong. |
154 | Go itlhaba ka thipa mpeng. | Go dira sengwe se ko phelelong se utlusang wena botlhoko. |
155 | Go itlhaba nngololo. | Go ipaya yo lebetseng sengwe se o tshwanetseng go se dira. |
156 | Go itlhaloganya ditlhaa le tlhogo. | Go ikitse. |
157 | Go itlhatlaganyetsa magala tlhogong. | Go kaya diemo tsa gago di le botoka go na le ka fa di ntseng. |
158 | Go itoma sankatlhe/molomo wa tlase. | Go dira sengwe ka manontlhotlho le tlhwaafalo. |
159 | Go itoma sekgono. | Go ikana ka go dira selo se go dumelwang se sa kgonege. |
160 | Go itoma/itlantla diteme. | Go tlhoka mafoko a a supang bonnete. |
161 | Go itsala jaaka peba. | Fa ngwana a goditse motsadi wa gagwe thata. |
162 | Go itseta/ingata ka mogatla. | Go tlhabiwa ke ditlhong thata kgotsa go tshoga. |
163 | Go itshela/nna moriti o tsididi. | Go itira yo o sa itseng sepe/Go sa tshwenyegeng. |
164 | Go itshoga dithabela. | Go nna ka letshogonyana mo moweng. |
165 | Go itshwara khubu. | Go bakela molato o o dirileng ebile o kaya go re ga o kitla o o boelela. |
166 | Go itshwara madi. | Go bolaya wa losika la gago. |
167 | Go ja dijo tsa ditoro. | Go akanya go re o ka fitlhelela dilo tse di sa kgonegeng. |
168 | Go ja ditlhare ka meno. | Go nna le bolwetse ja tlhaloganyo. |
169 | Go ja hularelabeno. | Go itebatsa legae. |
170 | Go ja kgano o mo laela/le mogatla. | Go itshenyeletsa. |
171 | Go ja magala. | Go galefa thata, o omana. |
172 | Go ja maswe a bankane ba gago. | Go palelwa ke go itirela dilo, o gaisiwa ke ba o godileng nabo. |
173 | Go ja mmu le makwete. | Go galefa thata, o omana. |
174 | Go ja mofufutso wa phatla. | Go akola maduo a tiro e o e dirileng ka mashetla. |
175 | Go ja mokaragana wa botshelo. | Go ja monate mo botshelong. |
176 | Go ja mokwana ka lepe. | Go tshela sentle go sena mathata ape. |
177 | Go ja monate. | Go itumedisiwa ke se o se dirang. |
178 | Go ja mosekelampeng. | Go dirisa selo o ise o se duelele. |
179 | Go ja motho direthe. | Go seba mongwe, o mmua maswe. |
180 | Go ja motho ka loleme. | Go tsietsa motho ka mafoko. |
181 | Go ja motho ka meno. | Go omanya motho thata sa go mmolaya. |
182 | Go ja motho nko e sa butswa. | Go garumela motho o sa mo fe sebaka sa go itlhalosa. |
183 | Go ja motho ping. | Go nota motho ka menwana/dinala. |
184 | Go ja motho ratho. | Go kgopa motho ka maikaelelo a go mo diga. |
185 | Go ja naga ka lonao. | Go sia o iphalotsa. |
186 | Go ja nakaladi ya kobolela. | Go tshela sentle go sena mathata ape. |
187 | Go ja nku meno. | Go iketla, o sa tshwenngwe ke sepe. |
188 | Go ja ntša. | Go sotlega/humanega fela thata. |
189 | Go ja o namile. | Go iketla, o sa tshwenngwe ke sepe. |
190 | Go ja pipamolomo. | Go amogela mpho e e go didimatsang go re o se ke wa bua sephiri. |
191 | Go ja pitsa e sa tsholwa. | Go inaya ditshwanelo tse o iseng o di rebolwe ke ba ba lebanyeng. |
192 | Go ja pitsa e tsholwa. | Go bega go re tiro e weditswe mme e ise e simolowe (ka o dumela go re o tla kgona go e wetsa). |
193 | Go ja/kgora ka mpa tse pedi. | Go kgora thata. |
194 | Go jela ka mogopo o tletse. | Go tshela sentle go feta ka fa go neng go solofetswe. |
195 | Go jela madi tlhakeng. | Go fetsa madi ka bonako, ka ntata ya go a dirisa botlhaswa. |
196 | Go jela motho le matlape. | Go nyatsa motho o mo lebile. |
197 | Go jelwa matlho a tshwene. | Go tsiediwa. |
198 | Go jesetsa motho mo lesweng/kgobedung. | Go nna o utlwisa motho botlhoko ka go mo tshwenya ka mafoko kgotsa go mo tlhorontsha. |
199 | Go kabolola motho ditshoka/ditsebe. | Go thatafaletsa motho kotlhao ya se a se direleng, bogolo jang fa a se a se dira ka bomo. |
200 | Go kalakatlega jaaka poo ya mariga. | Go tsamaya-tsamaya go lebega o sena ko o yang. |
201 | Go kaya ntwa setlhanka. | Go tlhalosa tiragalo ka fa e neng e sa nna ka teng ka go bo o sa e bona. |
202 | Go kgadisa motswetsana. | Go feleletsa kgotsa go bolaya motswedi. |
203 | Go kgama ntšanyana. | Go bofa lebanta thata, mme le fetswa ke borokgwe fa lethekeng. |
204 | Go kgaogelwa ke mpeetshane. | Go itlhaganela/taboga thata go leka go fitlhelela sengwe kgotsa go tshwara nako. |
205 | Go kgaola motho molebo wa nko. | Go nna le monko o montsi o o seng monate. |
206 | Go kgetlha dithupa. | Go tlhapologa. |
207 | Go kgobela kwa ntle ga kika. | Go palelwa thata ke go dira sengwe. |
208 | Go kgobola ntho legogo. | Go tsosolosa matlhoko a a fetileng. |
209 | Go kgola naka lwa tholo. | Go dira tiro e e thata. |
210 | Go kgotla motshitshi/semane. | Go rumulana/go ipiletsa mathata. |
211 | Go kgwa molalatlhaeng. | Go ntsha boammaaruri morago ga go sokodisa batho ka jone. |
212 | Go kgwa motho dikgaba. | Go amogela mafoko a motho a sa tswang go a bua ka go akgela mo go one. |
213 | Go kgwisa motho lerapo. | Go tseela motho monyetla wa go dira sengwe se se mosola mo go ene, a setse a se simolotse kgotsa a le gaufi. |
214 | Go kopa sego sa metsi. | Go batla ngwetsi. |
215 | Go kopanela mo kobong ya kgomo. | Go sala motho morago, go isa losong. |
216 | Go kubetsana ka dikgono/dijabana. | Go sa utlwaneng mme lo nna/dira mmogo. Ba nna ba lwa. |
217 | Go lala ka lobadi. | Go lesa kgang e ya modiga, mme e se go re o kgotsofaletse ka fa e feditsweng ka teng. |
218 | Go lala ka ntho madi a tshologa. | Go robala bosigo mme o sentse o hutsafaditswe thata ke sengwe. |
219 | Go laolwa ke lonao. | Go nna o tsamaya-tsamaya; go sasankega. |
220 | Go latlha seditse. | Go itlhoboga. |
221 | Go latlhela/tikela tlhware legonyana. | Go akgela mo kgang. |
222 | Go latswa ke noga/tlhware. | Go nna lesego [go falola ka lesego] |
223 | Go le aramela le sa go tlhabetse. | Go dirisa monyetla o santse o le teng. |
224 | Go le botsa phokoje. | Go sia ka lobelo o iphalotsa. |
225 | Go le supa le le fa. | Go gana gotlhelele. |
226 | Go lebela motho mo metsing. | Go nyatsa motho o mo lebile. |
227 | Go leka ditlhare bothitho. | Go lekeletsa dilo mme o sa dumele di ka kgonega. |
228 | Go leka motho tumelo. | Go kgobera motho maikutlo thata mme a ntse a leka go itshwara. |
229 | Go lela/nna dikeledi tsa mathe. | Go ipaya yo utluleng botlhoko kgotsa o lela. |
230 | Go lelela kgama le mogogoro. | Go latlhegelwa ke dilo tse dintsi tse di botlhokwa mo go wena. |
231 | Go lelelwa ke sekwakwalala. | Go diragalelwa ke sengwe se se utlusang botlhoko thata. |
232 | Go lema lopetleke. | Go tsena gongwe le gongwe go sena se se go kganelang. |
233 | Go lesa dikoko di ja. | Go sa tlhokomeleng. |
234 | Go lobela motho dintsi. | Go bolaya motho ka sephiri. |
235 | Go logela motho segwenegwene. | Go direla motho leano le le bosula. |
236 | Go loma ka tlhaa/meno. | Go dira tiro e e thata o le esi. |
237 | Go loma motho serota. | Go tlhomagana le motho go le gaufi. |
238 | Go loma motho tsebe. | Go sebela motho. |
239 | Go loma ngwaga. | Go ja maungo a ntlha a ngwaga. |
240 | Go loma o fodisa. | Go nna borai mo go ba bangwe mme o itirile mosiami. |
241 | Go lomana ka meno. | Go lwa ka mashetla. |
242 | Go longwa ke noga maoto a mabedi. | Go tlhaselwa/senyediwa ke motho (bogolo jang yo o neng o mo tshepha). |
243 | Go longwa ke ntša o e otlile. | Go welwa ke mathata ka ntata ya sengwe se o se simolotseng. |
244 | Go lwela lerapo. | Go lwela maemo/madi. |
245 | Go lwela meriti le bommantsiane. | Go tlhoka se o se dirang motshegare otlhe o tlhola ka fa tlase ga ditlhare. |
246 | Go mela maoto. | Go nyelela ka ntlha ya go utsuwa. |
247 | Go metsa o sa tlhafuna. | Go batla maduo mme o sa a berekela. |
248 | Go moma molomo. | Go sa bueng. |
249 | Go neela motho seditse. | Go amogela gore o fentswe ke yo mongwe. |
250 | Go neela ntša tlhong. | Go itsaya jaaka motho yo se nang segakolodi. |
251 | Go neela tshwene marapo. | Go nna setshwakga. |
252 | Go nesetsa mafoko pula. | Go supa dore o itumelela mafoko a a sa tswang go buiwa. |
253 | Go nkgisana magwafa. | Go phadisanya. |
254 | Go nna borethe fela jaaka tlhapi. | Go nna maaka thata mo go sa lemotshegeng (o iketsha mo mathateng). |
255 | Go nna dikgang ka marago. | Go sa boleleng batho dikgang. |
256 | Go nna dikobo dikhutshwane/di magetleng. | Go humanega. |
257 | Go nna dinala/dinalanyana. | Go nna legodu. |
258 | Go nna dipeba tsa mosima o le mongwe. | Go dumalana ka sengwe le sengwe. |
259 | Go nna diya thoteng di bapile. | Go tshwana ka mekgwa. |
260 | Go nna fa gare ga dinaka tsa kukama/nare. | Go nna mo mathateng a a matona. |
261 | Go nna gopane wa moikapari. | Go sotlega/humanega fela thata. |
262 | Go nna ka diatla/matsogo. | Go se dire sepe/go nna setshwakga. |
263 | Go nna ka ditsebe. | Go sa reetseng. |
264 | Go nna ka lerago le le lengwe. | Go nna o tshogile. |
265 | Go nna le boiteo jwa thupa. | Go nna mosola mo go ba bangwe. |
266 | Go nna le letsapa le le go fisang pelo. | Go tshwenngwa ke sengwe mo mogopolong. |
267 | Go nna le mosi wa dikgong tse di metsi. | Go bua dipuo tse di botlha kgotsa go nna bodipa thata. |
268 | Go nna lefetwa. | Go tlhoka go nyalwa/go nna motona that o ise o nyalwe. |
269 | Go nna legano/dipuo tse di botlha. | Go nna o bua mafoko a a tsitsibanyang mmele. |
270 | Go nna loleme lo borethe. | Go nna maaka thata mo go sa lemotshegeng (o dirisa motho sengwe). |
271 | Go nna loleme. | Go tsamaisa maaka. |
272 | Go nna madimabe. | Go tlhoka lesego. |
273 | Go nna makgabe a dipapetla. | Go itlhaganela. |
274 | Go nna malala-a-loatswe. | Go nna o ipaakanyeditse seemo/tiragalo se se tlang. |
275 | Go nna maoto a tshupa. | Go dira ka bonya. |
276 | Go nna mariba a kgokong. | Go sa supetseng batho se o ka tswang o se akantse. |
277 | Go nna matlhomatlho/matlho mantsi. | Go ratana le basetsana/basimane ba bantsi. |
278 | Go nna mo mmeleng. | Go ima. |
279 | Go nna modidi wa nta ya tlhogo/e e motopo. | Go humanega mo go utlwisang botlhoko. |
280 | Go nna modiga. | Go emisa ntwa. |
281 | Go nna moipolai yo o sa lelelweng. | Go itsenya mo mathateng. |
282 | Go nna mokwatla mokhutshwane. | Go kgona go tshola bana ba bantsi go sena mathata. |
283 | Go nna mokwatla moleele. | Go sokodisiwa ke tsholo, mo o feletsang o na le bana ba ba palo potlana. |
284 | Go nna mooko o thata/Go tia mooko. | Go tlhagafadiwa ke sengwe. |
285 | Go nna moriti o tsididi. | Go ipaya yo sa boneng mathata/seemo se se teng. |
286 | Go nna morui wa kgomo e telele. | Go nna mohumi wa maruo. |
287 | Go nna mosima wa phika ka marago. | Go nna mo diphatseng (gantsi, o sa lemoge). |
288 | Go nna motho wa nama le madi. | Go palelwa ke dilo tse dingwe. |
289 | Go nna nta ya selomela kobong. | Go nna letsipa. |
290 | Go nna ntwa-dumela. | Go rata ntwa. |
291 | Go nna pelo pedi. | Go nna le megopolo e e ganetsanang. |
292 | Go nna pelo/pelonomi. | Go nna motho yo o lebole mo go thuseng ba bangwe. |
293 | Go nna pelokgale. | Go sa nneng le boboi. |
294 | Go nna pelompe/pelo e e maswe. | Go nna setlhogo. |
295 | Go nna pelotlhomogi. | Go nna lorato, o hutsafadiwa ke go bona motho yo mongwe a sokola. |
296 | Go nna pharameseseng. | Go rata go nna fa gare ba basadi/basetsana, mme o se mo maratong. |
297 | Go nna phokoje o o dithetsenyana. | Go nna motho yo o matlhalenyana a go tshela. |
298 | Go nna podimatseba. | Go itse se se diragalang mo tikologong ya gago. |
299 | Go nna sebete se molangwana. | Go sa kgotsofaleleng seemo. |
300 | Go nna sebete. | Go tlhoka botho ka ntateng ya go tlhoka tlhong. |
301 | Go nna teme pedi (o se gopane). | Go nna leferefere. |
302 | Go nna thari. | Go siiwa ke nako. |
303 | Go nna tsebe di telele. | Go rata mafoko a a sa go ameng. |
304 | Go nna tsebe ntlha. | Go utlwa ka bonako. |
305 | Go nna/jela mo letlepung. | Go nna mo seemong se o sa tlhokeng sepe, e le ntletsentletse. |
306 | Go ntsha ditlhogo. | Go fa malome mpho (o le setlogolo) jaaka go solofelwa, gore a go fe matlhogonolo. |
307 | Go ntsha ga tshwene. | Go dira sengwe o ipheleleditse. |
308 | Go ntsha lobelo. | Go fa ngwana matlhogonolo ka go tsaya sengwe mo go ene. |
309 | Go ntsha mosi ka sekhurumelo. | Go ntsha sephiri. |
310 | Go ntsha motho dijo ganong. | Go tseela motho monyetla wa go dira sengwe se se mosola mo go ene, a setse a se simolotse kgotsa a le gaufi. |
311 | Go ntshana se inong. | Go ratana thata. |
312 | Go ntshwarisa moletse wa namane ke le nosi. | Go bolaisiwa tiro o sena mothusi. |
313 | Go nwa moro wa tibe. | Go tsamaya o tswa kwa o ntseng o le. |
314 | Go nwa motho moro wa godimo. | Go tsietsa motho ka sengwe se a se sokoletseng. |
315 | Go nya photi boloko. | Go sia o iphalotsa. |
316 | Go nyala lefufa. | Go nyala basadi ba bantsi. |
317 | Go nyela matlotla. | Go itshenyeletsa go re kamoso o seke wa kgona go buela. |
318 | Go nyema mooko. | Go latlhegelwa ke botlhaga mo go direng sengwe. |
319 | Go nyera marapo. | To felelwa ke maatla a a tshosang. |
320 | Go okangwa ke leru le le ntsho. | Go nna o tshogile go re o tsile go diragalelwa ke sengwe se se botlhoko. |
321 | Go oketsa marago ka matlapa. | Go kaya diemo di le botoka go na le ka fa di ntseng. |
322 | Go ongwa ka logare o bo o beolwa ka lone. | Go tlhagisiwa ka sengwe se se diphatsa, mme se bo se felela se go diragaletse. |
323 | Go opisa motho tlhogo. | Go sokodisa motho mo a nnang a go akantse. |
324 | Go ora ka fa mosing. | Go nna mo seemong se se seng monate mo go wena, ntswa ba bangwe se sa ba sokodise. |
325 | Go palama ka mekwatla ya ba bangwe. | Go dirisa batho ba bangwe go bona katlego. |
326 | Go palama kukama. | Go nna mo mathateng a a matona. |
327 | Go palangwa ke pelo mo seroteng. | Go tenega thata mo o feleletsang o sa kgone go itshwara. |
328 | Go paralatsa menwana. | Go rekisa ka tlhwtlhwa e e kwa godimo thata. |
329 | Go patisa poo ka letshwagola. | Go kapa motho fa a sa solofelang. |
330 | Go pega motho dinaledi. | Go galaletsa motho ka sengwe se se ntle se a se dirileng. |
331 | Go petla ditlhako. | Go swa. |
332 | Go phunya phefo. | Go taboga ka lebelo le le kwa godimo thata. |
333 | Go phunyeditsa pudungwana dintsi. | Go tsenya mongwe mo seemong se se diphatsha. |
334 | Go phuthela motho ka kgetse. | Go tsietsa mongwe ka mafoko a tseela gore o bua nnete. |
335 | Go phuthulola mowa. | Go letla batho go re ba dire sengwe o sena ngongorego epe mo moweneg. |
336 | Go pota motho ka ko morago. | Go direla motho leano le le bosula o bo o le diragatsa a sa lemoge. |
337 | Go raga thokolo/lepai. | Go swa. |
338 | Go ragwa ke ntšhe. | Go onalelwa. |
339 | Go rapamela none ese yo. | Go tsenatsena mo dikgang tse di sa go ameng. |
340 | Go ratela photi ka matlhowa. | Go itshenyeletsa mo sengweng se o lekang go se dira. |
341 | Go re semene mpona. | Go sia o iphalotsa. |
342 | Go rekela kolojane kgetseng. | Go duelela sengwe, mme o ise o se bonye makowa. |
343 | Go repa ditlhaa. | Go palelwa ke go tshwara diphiri. |
344 | Go roba mosetsana leoto. | Go imisa mosetsana. |
345 | Go robala ka ditlhako. | Go nna fela o sa itse dilo tse di diragalang mo tikologong ya gago. |
346 | Go robala ka leitlho le le lengwe. | Go nna o ipaakanyeditse go itse/bona se se ka diregang. |
347 | Go robalelwa ke ditlhokwa. | Go nna le kagiso, o sena mathata ape mo botshelong. |
348 | Go roka molomo. | Go itidimatsa o sa bue sepe. |
349 | Go rokotsa motho mathe. | Go kgatlhisa motho gore a batle sengwe. |
350 | Go rolela motho hutshe. | Go akgola motho fela thata. |
351 | Go roroma dirope. | Go tshoga mo go feteletseng. |
352 | Go rotha kgodu e khibidu. | Go tshologa madi. |
353 | Go rothisa mmutla madi. | Go ntsha sephiri. |
354 | Go ruta betsi. | Go ruta batho ditsamaiso tse disha. |
355 | Go ruta tshwene mapalamo. | Go ruta motho selo se a sa se itseng. |
356 | Go rwala kolobe e sa phunngwa. | Go rwala morwalo o o bokete. |
357 | Go rwala masigo/makuku ka tlhogo. | Go tsamaya/dira tiro fa gare ga bosigo. |
358 | Go rwalela setlhako le mmitlwa. | Go ikanya motho o sa lemoge boferefere jwa gagwe. |
359 | Go sa ingwaelwe matsetse. | Go tshabiwa kgotsa go tlolwa. |
360 | Go sama tsebe. | |
361 | Go se bona. | Go tshosediwa go re o tla diragalelwa ke sengwe se se maswe fela thata. |
362 | Go sega tsebe. | Go tlhabisa ditlhong. |
363 | Go segela motho fa lefureng. | Go direla motho sengwe se a se itumelelang thata. |
364 | Go segela ngwana thari mpeng. | Go itsholofetsa gore sengwe se tla direga mme go sentse go na le kgonagalo ya gore se retele. |
365 | Go sekelwa ke ditshoswane. | Go sa itweleng o baya fela gore Modimo o tla otlhaya ba ba go diretseng bosula. |
366 | Go sela dipampiri. | Go tsenwa. |
367 | Go setela motho dimapo. | Go thaisa motho. |
368 | Go sha ntshu o sa ogole sepe. | Go itsenya thata mo dikgang tse maduo a tsone a sa tleng go go ama. |
369 | Go sia ka tlhaloganyo ya motho. | Go aketsa motho thata mo a tseelang gore o bua nnete. |
370 | Go siela mo setlhareng se se mmitlwa. | Go leka go falola sengwe ka go itsenya mo diphatseng tse dingwe. |
371 | Go siiwa ke none e tlhotsa. | Go palelwa ke tiro e bonolo. |
372 | Go sila o tlhatlegile. | Go dira tiro o le ka fa tlase ga kgatelelo ya nako. |
373 | Go suga hutshe. | Go ikokobetsa thata (gantsi e le fa o ikopa maitshwarelo). |
374 | Go sutlha legano. | Go ja go le gonnye fela go fokotsa tlala. |
375 | Go swa ka khupamarama/lefunelo. | Go swa ka sephiri. |
376 | Go swa mhama. | Go golafala mo letlhakoreng, o sa kgone go le dirisa. |
377 | Go swa senku. | Go itlhoboga, o sa itwele. |
378 | Go thanya [lomapo] lo le tsebeng. | Go lemoga borai ja selo se setse se go gobaditse. |
379 | Go thiba metsi a molapo ka letlhaku. | Go leka go kganela sengwe ka selo se se senang bokgoni ja go se kganela. |
380 | Go thiba motho maroba a pelo. | Go kgoreletsa motho mo moweng. |
381 | Go thuba kobo segole. | Go iketla, o sa tshwenngwe ke sepe. |
382 | Go thuba motho pelo. | Go direla motho bosula jo a neng a sa bo solofela. |
383 | Go thubela motlopo wa khudu godimo. | Go kganela sengwe se se botlhoko go diragala. |
384 | Go tla itse se ntša e se robalelang mo isong. | Go tshosediwa go re o tla diragalelwa ke sengwe se se maswe fela thata. |
385 | Go tla ka makatlanamane. | Go tla lo le bantsi ko pitsong/modirong. |
386 | Go tla kgomo di bolotse. | Go goroga go nake e setse e fetile. |
387 | Go tlaila motho. | Go foufatsa motho ka boloi. |
388 | Go tlala ka lekgasa. | Go omanela kwa godimo, o shakgetse. |
389 | Go tlhaba kgobe ka mmutlwa. | Go iketla, o sa tshwenngwe ke sepe. |
390 | Go tlhaba mainane. | Go bua puo e e sa tlhaloganyesegeng, o tshwara kwa le kwa, go tile go bua nnete. |
391 | Go tlhaba podi matseba. | Go itsise. |
392 | Go tlhaba-tlhaba mpa ka mmutlwa. | Go senyeletsa motho seemo se se siameng. |
393 | Go tlhabisa motho ditlhong/kgala. | Go direla motho sengwe se se mo digang seriti le maikutlo. |
394 | Go tlhanola direthe. | Go sia o iphalotsa. |
395 | Go tlhapa mongwe/sengwe diatla. | Go itlhoboga ka mongwe le ditiro/maitsholo tsa gagwe tse a ganang go di tokafatsa. |
396 | Go tlhapisa ditlhogo/masori. | Go fa setlogolo (o le malome) mpho e e supang fa o amogela ditlhogo, ebile o mo segofatsa. |
397 | Go tlhatlega mashi. | Go itlhaganela. |
398 | Go tlhoboga khudu e rathwa. | Go itlhokomolosa kgokgontsho ya ba bangwe. |
399 | Go tlhoka molomo. | Go sa bueng sepe le ntswa go solofetswe gore o akgele. |
400 | Go tlhoka nko e e tswang lemina. | Go sa direneng sepe se se solofetsweng. |
401 | Go tlhoka tsebe. | Go se utlwe (go seleka). |
402 | Go tlhokafala. | Go swa. |
403 | Go tlhola motho meno. | Go lemoga makowa a motho. |
404 | Go tlhoma/baya motho letlhokwa. | Go beeletsa motho go tla o mo nyala, isago. |
405 | Go tlhomoga pelo. | Go utlwela yo mongwe botlhoko. |
406 | Go tlhomola pelo. | Go utlwisa botlhoko. |
407 | Go tlhotlhora nakedi. | Go tlhatlhoba motho (o le ngaka) o dirisa boola. |
408 | Go tlodisa motho dinokana/melapo e tletse. | Go thusa motho a le mo dipharagobeng. |
409 | Go tlolwa ke dipeba. | Go latlhegelwa ke boleng/bomosola. |
410 | Go tsalwa ka meno. | Go a bo o sale o ipaakanyeditse se se ka diragalang. |
411 | Go tsamaela maoto go ruruga. | Go dira tiro e ntsi mme e sena maduo. |
412 | Go tsamaela motho. | Go dira go le gontsi go batlela motho tharabololo mo diimong tse di ka tswang di mo lebane. |
413 | Go tsamaya ka pula, o goroge ka pula. | Go nna le mosepele o montle. |
414 | Go tsamaya le lorole. | Go tsamaya o bapisitswe/setswe morago ke batho ba bantsi. |
415 | Go tsaya motho ka letsogo la molema. | Go sa tseyeng motho ka lorato le tlotlo. |
416 | Go tsaya tsia. | Go lemoga sengwe se le mosola. |
417 | Go tseisane molelo. | Go nna le botsalano jo bo kitlaneng. |
418 | Go tsena ka lenga la seloko. | Go nyelela. |
419 | Go tsena motho ganong. | Go bua motho yo mongwe a santse a bua. |
420 | Go tsenela motho ka sekgwa/mo sekgoropeng. | Go iphitlhela motho. |
421 | Go tsenwa ka mala a masesane. | |
422 | Go tsenya khadi monwana. | Go dira tiro e e sa go lekanang. |
423 | Go tsenya kwena gae. | Go tsisa selabe mo lwapeng. |
424 | Go tsenya lentswana. | Go oketsa boleng ja sengwe. |
425 | Go tsenya marapo/mooko mo dinameng. | Go oketsa maatla a o dirang sengwe ka one. |
426 | Go tsewa ke ga e a lala e robetse. | Go ya le bontsi ko bo yang teng, o sa ikakanyetse. |
427 | Go tshaba e e dumang o ya go e e bobileng. | Go leka go falola sengwe ka go itsenya mo diphatseng tse dingwe. |
428 | Go tshaba/katoga monyo. | Go nna moleele. |
429 | Go tshabela mosetlho mo thepeng. | Go inamola mongwe yo o bogale ka go itebaganya le yo o bonolo. |
430 | Go tshabisa mala ditlhokwa. | Go sireletsa mo diphatseng. |
431 | Go tshawrisa motho letlapa/logaga. | Go emisa motho lobaka lo lo leele. |
432 | Go tshela motho malepe. | Go thusa motho mo go dira tiro. |
433 | Go tshela noga mmu. | Go rumula motho yo ntseng a tenegile gale. |
434 | Go tshela sa ntša le katse/phiri. | Go tshela mmogo ka go sokodisana. |
435 | Go tshelegelwa ke madi a kgofa. | Go iphitlhela o tshwaeditswe ke mathata a a sa go ameng. |
436 | Go tshelela dithupa letshotelong. | Go ipaakanyetsa go otlhaya motho fa a sa solofelang teng. |
437 | Go tshologa motho mokgosi. | Go tla lo le bantsi go thusa motho a le mo mathateng. |
438 | Go tshosa ka mororo. | Go tshosetsa ntswa o le boi. |
439 | Go tshosetsa ka noga e sule. | Go tshosetsa batho ka selo se se senang borai bope mme bone ba sa itse. |
440 | Go tshwara mala ka letsogo. | Go nna o tshogile go re o tsile go diragalelwa ke sengwe se se botlhoko. |
441 | Go tshwara motho ka nko. | Go neela motho motsoko a goge. |
442 | Go tshwara motho ka pelo. | Go sa itshwarele motho, o tswelela ka go mo eleletsa tse di bosula. |
443 | Go tshwara motho mogoma. | Go ithusa ka se se dirwang ke motho yo mongwe. |
444 | Go tshwara noga ka mogatla. | Go rumula motho yo o bogale. |
445 | Go tshwara phage/tau ka mangana. | Go lebagana le bothata jo bogolo. |
446 | Go tshwara/hupa ka tlhaa. | Go tshwara sephiri. |
447 | Go tshwaraganya dinaka tsa podi. | Go bua maaka a mantsi mo o feleletsang o palelwa ke go bua sengwe se se tlhaloganyesegang. |
448 | Go tshwaratshwara. | Go lowa. |
449 | Go tswa ga Lowe. | Go tswa bogologolong thata. |
450 | Go tswa ka dikgoro. | Go tsamaya (o simolola mosepele). |
451 | Go tswa ka soba la mogodu. | Go falola ka lesego. |
452 | Go tswa mo diatleng. | Go latlhegelwa ke taolo ya sengwe. |
453 | Go tswa motho diatla. | Go thusa motho go dira sengwe. |
454 | Go tswa motho dinao. | Go thusa motho ka go mo tseela mosepele. |
455 | Go upa maraka tau e setse e tlhasetse. | Go ikotlhaela go bo o sa kganela tshenyo, e setse e diragetse. |
456 | Go utlwa botlhoko. | Go ikutlwa o hutsafetse. |
457 | Go utlwa dinala. | Go utsuwa. |
458 | Go utlwa ka podi ya tsela. | Go utlwa ka magatwe. |
459 | Go utlwa ka tsa ga Morakile. | Go sa tlhaloganyeng se se builweng sentle. |
460 | Go utlwela motho botlhoko. | Go hutsafadiwa ke go bona yo mongwe a le mo mathateng. |
461 | Go wa ka mpa ya sebete. | Go wela tlase o tswa mo maemong a akwa godimo. |
462 | Go wela dingalo. | Go nna le mathata a a go tlhokisang kagiso mo moweng. |
463 | Go welwa ke kgetse. | Go bonwa molato. |
464 | Go welwa ke seru. | Go nna mo mathateng/mahutsaneng ka nakwana. |
465 | Go ya bokgwelwa. | Go itebatsa legae. |
466 | Go ya boyabatho. | Go swa. |
467 | Go ya dira o se thata. | Go tsena mo seemong se o senang dithata tsa go se fenya. |
468 | Go ya ga maotwana-hunyela. | Go swa. |
469 | Go ya kwa tsie e ileng teng. | Go tsamaela ruri go sa itsiwe ko o ileng. |
470 | Go ya le kgomo ngakeng. | Go kopa thuso o setse o tshwere dituelo tsa mothusi wa gago. |
471 | Go ya magaleng ga bedi. | Go boelela mo mathateng a o kileng wa tsena mo go one. |
472 | Go ya magoletsa. | Go oketsega. |
473 | Go ya monama o ya. | Go tsamaela ruri go sa itsiwe ko o ileng. |
Tobetsa fa go bona maele ka ditlhaloso tsa Sekgowa; kgotsa fa go ya ko tsebeng ya maele ka kakaretso.